Версия для печати
02 августа 2020

Акоронавирус иахҟьо ашәарҭара иазкны Ареспубликатә партиа “Аҧсны жәлар ракзаара Афорум” иҟанаҵаз аҳәамҭа

Ҳҽацәаҳахьчап уаҩ дзымшаҭо ачымазара-ҿкы!

Ҳаҭыр зқәу ҳауаажәлар!

Ибзианы ишыжәдыруеиҧш, адунеиаҿы ачымазара-ҿкы COVID-19 ицәырнагаз ашәарҭарақәа ҳа ҳҟынӡагьы иааӡеит. Аҧсны азныказы иаарҧшыз агәҽанызаареи аиҿкаареи ирыбзоураны, ари арыцҳара иацәыхьчахеит ҳуааҧсыра. Иаркын агәашәқәа, уахгьы-ҽынгьы ршьапы иқәгылан аҳақьымцәа, анапхгаратә маҵзурақәа, аштабқәа, ҳара ҳхаҭақәагьы- иахьынӡазалшоз арежим ҳақәныҟәон, ҳаибахьчон. Убри аҟнытә аҧсыҭбарақәа, арыцҳарақәа иаҳа имаҷхеит, аҿкы-бааҧсы ахҭынҟьақәа уи аҟара иаҳнымыҧшит. Ааи, иҟоуп зыҧсҭазаара иалҵызгьы.Рыҧсаҭа лашазааит! Уи хьаас измам уаҩ дыҟам.

Аха нас, аамҭа аныбжьала, ҳгәы ҳарҭынчцәеит зегьы: анапхгарагьы, ауааҧсырагьы, егьырҭ амаҵзура ҷыдақәагьы. Ҳаҟәыҵит ахыхьчага сабрадақәа рныҟәгара, лассы-лассы ҳнеиуа ҳалагеит амассатә усмҩаҧгатәқәа рышҟа, ҩаҧхьа ауаа рацәа адгаланы, имҩаҧааго ҳалагеит ақьабз-аҵас. Иҟоуп COVID-19 реалтә инфекциатә ҿкыуп,ҳакәша-мыкәша аепидемиа гәароуп ҳәа зынӡаск агәра зымго, зхахьы иаазгарц зҭахымгьы. Хрыҩ раҳҭарц ҳҭахым апрофессорцәеи, академикцәеи раргументқәагьы.

Аха уажәы, лабҿаба ишаабо еиҧш, ачымазара аҽамырҭынчӡеит. Аҿкы зцәа иалалаз рыӡбахәала есыҽны иҳаҳауа аофициалтә статистика даара уацәшәартә иҟоуп. Уи ус ишыҟоу атәы аргама иҳалҳәеит Аҧсны асанитартә ҳақьым хада Лиудмила Скорик. Иналкааны иазгәалҭеит аспециалист хада, анкьатәи аҧҟарақәа рышҟа ҳахнымҳәыр, ҳхы ҳмыхьчар – ҳамч зқәымхо аситуациахь ҳнанагар шалшо атәгьы.

Иҟоу ауадаҩрақәа иҵегь изырхьанҭо акы акәны иҟалеит ҳтәыла аҳәаақәа раартра, хыҧхьаӡара рацәала атуристцәа раара. Еилкаауп, Аҧсны – дунеижәларбжьаратә туристтә регионуп, уи ахырхарҭа гәцаракра агымхароуп, ауаагьы рхы иахәароуп, аагарҭак роуроуп, рҭаацәа ныҟәыргароуп, иҿиароуп аекономика, абизнес. Иҵегь иҕәҕәахароуп Урыстәылеи Аҧсни реиҩызара. Аха ҳара ҳтәыла аҩныҵҟа аҿкы амҽхак анарҭбаауа аамҭазы, игәароу ачымазара шырмыхьуа ала аршаҳаҭгақәа змам ,ахыхьчагатә сабрадақәа зҿам ауаа зықьҩыла аҳәаа иахыжьны арахь раашьҭра ҳабакылнаго? Иаҳҳәап, усеиҧш ауадаҩрақәа ҟалар, иабанӡазыҟаҵо ҳара ҳмедицинатә усҳәарҭақәа ашәарҭа аанкылара?Иаҳзыхьчома иааз аҧсшьаҩцәа, иаҳзыхьчоума урҭ рымаҵ зуаа ауааҧсыра? Лабҿаба иаабоит ҳақалақьқәеи ҳраионқәеи рыхәышәтәырҭа хадақәа рҿы аҳақьымцәа рхаҭақәа аӡәырҩы акарантин ашҟа имцар ада ҧсыхәа шыҟамлаз.Ҳазегь иаҳҭахыуп урҭ ргәы бзиа, рхы бзиа ихынҳәырц рмаҵуратә уалҧшьақәа рахь.

Абас иҟоу, имариам аҭагылазаашьаҿы - акоронавирус аҿагыларазы Акоординациатә штаб хадагьы, анапхгаратә усбарҭақәа зегьы акырӡа идырҕәҕәароуп аҧҟарақәа рықәныҟәара, иҵегь иҳаракхароуп досу иҭакҧхықәра.

Аҳәара ҟаҳҵоит шәеилабжьарц, шәызегь, ахәыҷы инаиркны аду иҟынӡа- иаҧу аҧҟарақәа шәрықәныҟәарц! Ҳажәлар рҧеиҧши,рразҟи, ргәызҩыдареи ҳасаб рзуны, маҷк иаанаҳкылап ауаа-рацәа злахәу ақә-аҵас. Аибашьра хлымӡаах иацәынхаз , знапала зхақәиҭра зчаҧаз, фырхаҵареи гәымшәареи згым ҳмилаҭ, ачымазара –ҿкы иаҿаҵахәымхароуп! Иааҳарҧшып аҟәыҕара, аизыӡырҩрра! Ҳазхәыцып Аҧсны иҟоума, аҳәаанырцә иҟоума – ҳажәлар даара ишмаҷу! Ҳҽацәаҳахьчап адунеиаҿ уаҩ дзымшаҭо ари ачымазара гьангьаш! Ишәымазааит аманшәалара, ҳабыжь-ныхак рылҧха-ргәыҧха!

Ареспубликатә партиа “Аҧсны жәлар Ракзаара Афорум”

Прочитано 1892 раз

Похожие материалы (по тегу)